政壇：梁志祥團拜九大簋饗客

新界社團聯會會長梁志祥尋日喺其位於元朗洪水橋嘅府中搞新春團拜，特備富有圍村特色嘅屏山特產九大簋同盆菜款客，認真和味。講到新社聯發展，佢話旗下二百個聯會共有二十一萬會員，未來希望每年再招攬多一萬人，睇嚟想同建仔爭一日之長短喎！

招攬人才真係唔容易，咁啱我哋近日就見到梁志祥孖住屏山鄉鄉事委員會主席曾樹和一齊出宣傳橫額，莫非梁志祥連曾樹和都氹得掂？不過，佢話冇拉攏鄉事派加盟，一齊出橫額只因關係友好喎。佢又透露，新社聯嘅儲備已用得七七八八，所以計劃今年搞個籌款晚會，目標籌四至五百萬元。

立法會資訊科技界議員莫乃光同會計界梁繼昌尋日都搞團拜，佢哋就講咗個新年奇遇。話說年初四晚，莫乃光一支公去金鐘睇九點半場戲，點知一坐低，就發現隔籬個人睥實佢，望真啲先發現原來係盟友梁繼昌。咁點解兩個人都一支公去睇戲咁寂寞呢？原來莫乃光冇跟太太去美國加州同外母拜年，而梁繼昌就撞啱老婆喺屋企教仔，所以冇嘢做咪去睇戲囉！