政壇：沈祖堯耍靈蛇功迎校慶

中文大學校長沈祖堯尋日聯同十幾名副校長同院長集體「靈蛇出動」，向一眾傳媒拜年同玩抽獎。沈校長準備嘅抽獎禮物別具歷史價值，佢聲稱係明朝明太祖朱元璋飲過嘅瓷杯，其他教授嘅抽獎禮物亦包羅萬有。

沈校長除咗表演「靈蛇」功夫外，亦順便介紹中大五十周年校慶嘅慶祝活動，包括月底破紀錄有一千八百個中大師生同校友一齊參加渣打馬拉松。下月中沙士十周年，中大醫學院會搞國際研討會，邀請當年有份抗疫嘅國際專家到中大，商討日後點對抗沙士。