政壇：食衛新官急補鑊

新政府班子疑似對於利益申報嘅睇法不盡相同，有問責官員甫上任幾日就快快手申報，但有小部分人拖咗好一段時間先至肯申報，講嘅係食物及衞生局局長高永文「左右手」副局長Sophia陳肇始同政治助理陳凱欣。

雙陳拖得就拖

由於政府分批公布副局同政助名單，被視為「禁煙專家」嘅Sophia喺舊年十一月初獲任命為食衞局副局長，前電視台「小花」陳凱欣則喺同月底亦獲高永文垂青加盟做政助，之後「雙陳」唔知係咪忙於同立法會議員及各持份者「打交道」，竟然上任兩、三個月都未將利益申報放上網，同之前大部分問責官員上任一個多月就申報嘅做法不同，令人懷疑究竟係涉及人為定係技術問題。

世事嘅嘢唔提嘅時候可以拖得就拖，但尋日有其他政助被披露資產利益申報內容後，食衞局嘅網頁尋日就有得查閱「雙陳」嘅利益申報，事實證明「雙陳」真係拖得就拖，好似Sophia嘅申報其實內容唔多，主要申報喺英國倫敦有住宅物業，另有二十三間機構或團體銜頭，之不過佢簽名作實嘅時間竟然係上周四，換言之係農曆新年前幾日。至於陳凱欣嘅情況亦唔好得幾多，事關佢嘅利益申報都係本月一日先簽名作實，佢除咗申報已婚外，唯一申報嘅係擁有九龍東某物業單位。

話時話，政治人物最緊要係坦白，透明度愈高，被人非議責難嘅機會就愈細，希望「雙陳」經一事長一智，否則第時再有乜行差踏錯，搞到愈幫愈忙，要民望高企嘅高永文掉番轉頭為佢哋補鑊就唔好喇！