車公靈籤發警號 禽流威脅莫等閒

今年係蛇年，蛇有蛇路，鼠有鼠路，本來同雞冇乜關係嘅，不過太一叮喺度要提醒大家，有隻病雞不甘寂寞，蠢蠢欲動，隨時殺入香港，搞到雞犬不寧，港人最緊要自求多福吖。

唔係危言聳聽，貴州日前爆發禽流感，兩名年輕男女感染高致病性病毒，目前情況危殆。而最奇怪嘅係，兩名患者事前都冇接觸過活家禽，病毒源頭成謎，連點樣染病都唔知，咪話唔得人驚！

有人可能會話，香港離貴州咁遠，使乜驚喎。冇錯，兩地相隔幾千公里，表面上係風馬牛不相及嘅，而且據港府食物及衞生局局長高永文話，貴州發生確診病例附近一帶並無供港活雞場，暫時亦冇再發現新病例，相信人傳人風險極微，毋須提高本港防疫應變級別。講係咁講，但不可不知，病毒冇界限，禽流感話來就來，尤其係新春期間，往返兩地嘅人流特別多，一個唔小心隨時將病毒帶入香港，絕對唔係冇可能o架。所以話，有殺錯冇放過，防疫把關寧緊勿鬆，港產官僚咪大安旨意，以為禽流感人傳人機會唔大，就唔關香港事吖。

嗱嗱嗱，唔好話太一叮杞人憂天。車公靈籤預示香港蛇年運程係「宜慎小人，凡事不利」，唔只政治爭拗多，經濟唔理想，公共衞生方面更可能出現急速傳染嘅病毒添。正所謂好嘅唔靈醜嘅靈，○三年香港同樣得到一支車公下籤，結果嗰年沙士肆虐，奪去近三百條寶貴性命，搞到經濟奄奄一息，香港幾乎變成死城。十年生死兩茫茫，不思量，自難忘，呢場慘痛嘅教訓，港人依家仲係心有餘悸。

再講吖，今時今日病毒四處散播，奇難雜症特別多，唔到你唔小心。呢，貴州爆發禽流感，而英國就證實新增一宗新沙士病例，係全球確診嘅第十宗個案，連世界衞生組織都唔敢怠慢，呼籲所有成員國嚴陣以待。呢邊禽流感，嗰邊新沙士，萬一雙重夾擊，都咪話唔大鑊。

新年流流，大家都想平安大吉，冇病冇痛，但唔怕一萬，最怕萬一，香港流年不利，運程欠佳，衰起上嚟乜嘢事都有可能發生o架。車公靈籤已發出警號，如果衞生官僚仲係渾渾噩噩，咁就神仙都難救喇。一句到尾，防疫大家都有責任，市民固然要提高警覺，當局把關更加要打醒十二分精神，千祈唔好瞌眼瞓呀，叮！