政壇：政商定格：杜振源帶挈老友發橫財

沙田馬場尋日舉行蛇年賀歲盃賽事，國際小母牛香港分會籌款委員會主席兼「快勞夾大王」Simon杜振源同家人及好友入場玩，杜太曹麗明同一對仔女名下愛駒「小母牛」狀態大勇，以大熱姿態勝出，不足四個月內第三次奪冠，帶挈馬會大董葉澍堃等好友發咗筆新年財。早前Simon已捐出兩場頭馬獎金畀慈善機構小母牛，而今次得到嘅五十幾萬元獎金部分亦會撥出捐畀「小母牛」。

百仁基金主席李文俊夫婦都入場撐愛駒「包裝大哥」，但三甲不入。講起百仁基金，李文俊預告基金將會搞多啲青年活動，率先登場嘅係本月尾同中大學生會合作搞魔術表演晚會，籌備到表演都由同學負責，希望藉此累積年輕人解決問題嘅經驗。