政壇：搞搞政：嫻姐坦蕩蕩教分小人

新界鄉議局主席劉皇發年初二去車公廟幫香港求咗支下籤，籤文解釋係「宜慎小人」，由於當日發叔唔肯解籤，所以邊個係香港嘅小人，成為近日城中熱話。立法會議員陳婉嫻尋日出席花車巡遊時被傳媒追問，都唔敢估邊個係小人，只係話「小人」一詞難以定論，因為「人群中總有小人」喎。嘩，佢呢句真係可圈可點，薑永遠係愈老愈辣。

其實，嫻姐似乎有備而來，話好難揣測邊啲人係小人，但香港市民向來好有智慧，就算面對逆境都唔會氣餒。喺政壇打滾咗幾十年，其實有乜嘢可以逃出嫻姐法眼呀，所以傳媒問多幾句，嫻姐就話，一個圈子中，一定有小人，好難講誰對誰錯，但最緊要係「大家坦蕩蕩。」

到底點先可以坦蕩蕩呢？佢就舉咗個非常貼身嘅例子，話例如政府施政時要聆聽民意，聽晒民意後先去拍板決策，而唔係以為自己啱就去做。嫻姐將矛頭指向政府，似乎佢心中仲記住舊年長者生活津貼一役喎！