政壇：陳鑑林金猴摘桔攞意頭

猴子向來好有靈性，而且相當識食。立法會議員「橄欖」陳鑑林尋日趁住年初三同傳媒拜年，席間自爆「金猴摘吉」事件。佢話近日就發現有猴子「光顧」其黃大仙沙田坳道十二笏村大宅，但猴子並唔係偷佢啲桃，而係睇中佢放喺大宅門前棵大桔，佢隨即搬番棵桔入屋，又講笑怪責屋企門口狗看守失職。其實橄欖棵桔又大又靚，可能啲猴子喺冬天乾燥天氣下，忍唔住摘個桔嚟潤吓喉都未定，咪當係被金猴摘個「吉」囉，幾好意頭吖！

雖然佢因要捍衞棵大桔而傷腦筋，但當講起個外孫時，佢就笑得好燦爛。