政壇：泛民冇運行

泛民主派舊年成功喺立法會「拉布」令新政府「五司十四局」改組方案難產，惠及四十萬長者嘅長者生活津貼喺折騰多時先開綠燈，展望踏入新一年，佢哋會否喺議會繼續主導各項議程？答案係泛民喺蛇年冇乜運行。不過術數嘅嘢信則有，不信則無。

我哋今年繼續搵咗預測得準繩嘅香港術數家協會術數師楊子東睇吓泛民嘅蛇年運程，首先獲指點迷津嘅係白鴿黨。楊師傅坦言，白鴿黨嘅新舊主席劉慧卿同「鐵頭仁」何俊仁喺蛇年同樣要小心小人是非攻身，其中鐵頭仁仲被批喺農曆三月開始有是非，四月仲會有「大震撼」，咁啱鐵頭仁尋日同傳媒團拜時就自爆話佢天后住所大裝修，所以佢就喺深井租咗個複式海景單位暫住半年，有人就講笑咁問天后間屋大裝修係咪拆僭建，佢又講笑話係拆地下室同其他僭建喎，唔知「大震撼」同大裝修有冇關連呢？

泛民其他政團運程亦唔見得好得去邊，楊師傅估算李卓人「正、二月頭痕」，七、八月大旺，但冬季反覆，新民主同盟范國威則被指「春夏大旺，七、八月逆轉要低調」。至於梁耀忠更被估計「必有負面新聞」，仲要留意夏天要小心下屬及言語出錯，立秋後最不利。

大舊七八月易出事

被視為激進派嘅社民連同人民力量又點呢？都係運程認真一般。楊師傅形容，人民力量大舊陳偉業今年「有潛在危機，過剛則折，七、八月易出事」，社民連「長毛」梁國雄更加被批喺蛇年「危機四伏」，當中農曆四月屬於高危月份，但有貴人助力可逢凶化吉，唔知咁會唔會造成反效果，令到長毛更有恃無恐去衝擊同抗爭呢？咁睇怕泛民都係自身難保，意味做反對派攻擊政府係得唔到民心。