餸菜最貴天水圍 基層愈窮愈見鬼

尋日大年初二，開年飯有無大魚大肉呀？嗱，如果大家笑住點頭，咁就身在福中要知福嘞，事關香港仲有好多家庭為兩餐飯餸而煩惱。

政黨調查發現，白米、肉類、蔬菜等等十六種基本食品價格全部漲價，其中米、魚、豬肉、牛肉等等十種食物更加喺十年間漲價超過一倍。一般打工仔嘅人工加幅追到褲甩都追唔上，你話買餸煮飯係咪成為窮等人家嘅每日難題吖？

最令人驚訝嘅係，又話時窮「折」乃現，點知窮等人家買餸唔止無折頭，反而仲畀人斬多幾両添。你估全港邊區食物價格最高？居然係悲情城市天水圍！

喺天水圍，十六種基本食物之中有一半嘅售價就算係區內最平，依然貴過其他地區。以豬扒為例，最平都要賣每公斤一百零七蚊，比大埔足足貴咗超過四倍。牛肉差價都唔小o架，最貴三百蚊一公斤，就算平均售價都要二百二十蚊，比其他地區高出一半。

真係好諷刺，一個全港收入最低嘅地區，居然係全港買餸最貴嘅地區，簡直愈窮愈見鬼。如果話香港堅尼系數冠絕全球係本地貧富懸殊嘅有力指標，咁天水圍食品價格冠絕全港都算係香港貧富懸殊嘅有力註腳咯。悲情城市嘅基層家庭本來生活已經捉襟見肘，食物支出負擔仲要係全港最沉重喎，生活點會唔悲吖！

唔好忘記，食物價格高不可攀嘅負面影響唔止無啖好食咁簡單o架，貧困家庭左支右絀，食物支出上升等如削減子女供書教學嘅資源，讀書進修自我增值嘅機會減少，惡性循環之下，隔代貧窮同在職貧窮問題只會不斷惡化o架咋。政府成日話扶貧，係咪要伸出援手呀？係咪要扭轉呢個荒謬情景呀？

究竟乜嘢原因令到悲情城市嘅物價高到有口皆悲呢？調查政黨係咁講嘅，由於區內街市被領匯壟斷，欠缺競爭，所以物價有升無跌，居高不下。哦，原來又係領匯呢隻貪婪巨獸，居民肉隨砧板上，唔怪得任人魚肉啦，梁朝政府強調「適度有為」，快啲做嘢幫居民擊退怪獸魔爪啦。咪話太一叮唔提醒，民以食為天，人民唔係無得食至起革命，無啖好食一樣隨時反枱o架。

餸菜最貴天水圍，基層愈窮愈見鬼。官老爺食完開年飯，都係時候為升斗市民嘅飯餸問題籌謀嘞，天水圍食物價格再咁升落去，唔通真係叫居民食西北風咩，叮！