SUN搞作：打橫嚟講：蛇年俗語，過癮！

初三赤口，說話要謹慎，免生事端，古時啲人，為避爭執，這日，多留喺屋企，唔見人就最安妥。

家陣香港，平日忙到痹，現趁假期，死蛇爛鱔咁，匿埋蛇王幾日，做大懶蛇瞓餐飽，也賞心樂事。

上一段，用了多個有關蛇俗語，真係貼切到肉，這就是民族母語的威力，外族人無法感受的隔閡。

橫掂赤口，不宜批香港政府那棚庸官廢柴，不如同大家講吓我哋香港人自家母語——香港話吧！

蛇王，香港人皆知那是「偷懶」之意，但有小朋友問我，何解「蛇王」，會等於「懶到痹」？啊！那源於蛇每年冬天，都要鑽入地洞冬眠，郁都唔郁，畀人捉捕也不理，咁唔肯郁動的狀態，被人指為懶囉！「懶」到稱王的，仲唔係蛇王？兼由名詞變為動詞用！

蛇竇，原是蛇冬眠的地洞，現新解為蛇王偷懶的地方，再引伸一般打工仔期間中途休息的竇口，並多指可隱蔽的茶餐廳。

放蛇，本是警方派人偽裝並混入偵查地點辦案，後引伸凡找人假扮身份做調查，都叫「放蛇」。

劏蛇，正常人都直覺此乃蛇舖割蛇削肉，但原來，風月界的劏蛇，是手淫。男人自瀆，也叫「劏蛇」。

香港的蛇俗語還有很多很有趣的，例如叫差人的阿Sir，有人則叫為「阿蛇」，又唔知點解凡叫「蛇仔」的人，多數係「阿明」，仲有，「蛇頭」是領袖外，多數係偷運人蛇嘅船家！過癮吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府