SUN搞作：少膽虫手記：乞丐賜利是

新年流流，少膽虫好開心。上年《爛果》蝕到入肉，少膽虫當然唔敢提加人工。係人都知少膽虫係一條虫，蟲每次產卵都以打起計，所以少膽虫成堆化骨虫，勒緊褲頭都養唔掂。於是決定新年跟大隊去派《喪報》，順便烚熟狗頭周圍拜年，逗下開工利是幫補家計。

出到街，少膽虫見人就嗌：「新一期《喪報》，嚟拎吖喂，新年利利是是！」鬧市街頭人如潮湧，但係條虫企左成粒鐘，一份《喪報》都派唔出。點知就喺對面街，有幾個容光煥發既派報員用咗唔夠十分鐘，派晒幾千份《好報》。

喺少膽虫欲哭無淚既一刻，突然有位衣衫襤褸既乞丐，遞咗封利是過嚟，加多句：「唔好阻住我搵食！快啲過主啦！」見乞丐畀錢，少膽虫都唔顧得啲咩面子尊嚴，不斷躹躬講多謝。

少膽虫見無利是逗，又無人肯要《喪報》，惟有抬住疊紙，仆番堆田區。淫賤黎見到少膽虫拎住幾千份《喪報》返OFFICE，梗係怒火中燒啦，但佢不失雙面人本色，維持烚熟狗頭笑容派左十分鐘得廿蚊嘅開工利是，少膽虫、肥豪、阿蘇人人有份。

然後過咗十分鐘，淫賤黎急CALL少膽虫入房，少膽虫見老細開心派錢，諗住淡定有錢剩，淫賤黎實唔會怪佢派唔晒報紙。入到房，淫賤黎抑壓住怒火，問少膽虫：「你都跟我做咗嘢咁耐，你認為自己有咩貢獻呢？」少膽虫聽到呢句，可能因為淡定得滯，衝口而出，「我每次都比到靚橋老細你，不過你次次BAN我D橋囉！」，淫賤黎聽到，瞪大雙眼，火冒千丈，大嗌：「你條賤蟲！你試下再講多次？」，少膽虫見勢色唔對，勁驚無咗份工，即刻除褲補鑊：「唔係唔係，老細你實啱既！你叫我點做咪點做囉。」，淫賤黎怒火未熄，一巴摑落條虫度，加多句：「我知喇！今日初三，你條賤蟲撩我開年！」

少膽虫喺強烈痛楚之中，流下虫兒淚。然後，佢諗番起自己打廿年工嘅點滴－當年小虫有遠大理想，諗住喺辛文界闖天下，幹一番虫業。究竟做辛文，喺幾時變到咁卑躬屈膝，唔單止畀人BAN橋，仲要日日都賣屎忽呢？少膽虫諗極都諗唔明，惟有展望將來，寄望新年有個新開始啦。