《太陽》一出烏雲散 善心遺愛暖人間

新春新希望，蛇年行好運，係真嘅！

大家仲記唔記得患上罕見遺傳性心肌衰竭嘅李太？本來李太危在旦夕，兩個兒子又遺傳母親頑疾，一家人可以話陷入絕望邊緣。嗱，就喺李太生命進入倒數之際，《太陽報》上月廿五日以頭版報道咗呢個觸動人心嘅故事，結果奇迹真係出現咗，當日就有逝世病人捐出心臟。就係咁，憑着一顆善心，李太走出鬼門關，李家走出陰霾天，一家人得以手拖手喺隔離病房團圓過年。

更加令人振奮嘅係，李太康復進展理想，以前氣若游絲又骨瘦如柴，家陣已經可以聲如洪鐘咁同兒子閒話家常。以前要靠體外輔助儀器保命嘅李太，身上插滿水喉咁粗嘅喉管，家陣喉管唔見晒，反而生命捉到「一條好粗嘅救生繩」，深信自己嘅重生奇迹可以喺兩個兒子身上重演，一家充滿希望。李家感謝東方報業集團呼籲捐贈器官，話終於體會到呢句說話：風雨過後，總有晴天！

無錯，太陽一出，傳愛萬家，冷漠消融，烏雲消散，自然雨過天青啦。咁講啦，由李家嘅重生故事，大家清楚睇到兩個事實。第一個事實，《太陽報》全港銷量強勢第三位嘅招牌真係好夠照o架，一篇感人報道就照暖香江，激起有心人無私救人，終於喺死神手中搶回一條生命，喺黑暗之中照亮一個家庭。難怪有人話，有東方，無窮人，有太陽，無衰運！

至於第二個事實，就係香港人好善厚德，認真抵讚！啱o架，施比受更有福，與其新年入廟祈福，不如平日行善積福，開講有話，救人一命勝造七級浮屠，閣下銀包袋住一張器官捐贈卡，有福氣過袋住一張招財改運符啦，係咪？再講吖，捐贈器官唔只可以救人，更加能夠遺愛人間，等於延續自己嘅生命，何樂而不為呢？

人人行善，香港實掂。捐贈器官可以令港人得福，唔係祈福黨嘅惑眾妖言，而係有事實根據o架。家陣香港吵吵鬧鬧，家無寧日，如果有多啲正能量，多啲助人為樂，社會都和諧啲、團結啲啦，生活更加美好。嗱，李太係咁講嘅，素未謀面嘅人都願意伸出援手，佢以後會更加珍惜生命，用心待人，回饋社會！

就咁話啦，香港咁多年都無乜行過好運，諸事不順，風雨不斷，香港人不如一齊行善積福啦，齊齊響應捐贈器官，話唔定可以創造奇迹，蛇年已經有一個令人振奮嘅開始，叮！