康文署辣手摧花 英雄樹變落難樹

「紅棉怒放，驅去嚴寒，花朵競向高枝放」，雖然近日寒氣逼人，唱起呢首《紅棉》，即時感到幾分春意。紅棉即係木棉，又叫英雄樹，係香港常見嘅樹種，可惜近年不斷受到康文署嘅摧殘，英雄落難，講起都幾可悲。

事關近年有市民投訴木棉花絮紛飛帶來滋擾，康文署唔理三七二十一，派人強行摘除木棉果實甚至花朵，搞到木棉樹飽受摧殘，傷痕纍纍。好似前年春暖花開季節，上水有近百棵木棉樹嫣紅似火，不知幾咁詩情畫意，點知有政客無事生非，聲稱接到市民投訴指木棉花絮會誘發呼吸道毛病同鼻敏感，要求當局做嘢喎。康文署居然煞有介事搵承辦商代勞，卒之將鮮花摘得一乾二淨。英雄樹一朵花都冇，變咗光禿禿嘅落難樹，令人啼笑皆非。

其實，木棉樹隨處可見，開花結果係自然規律，棉絮飛揚只係好短時間，而且對市民健康影響微乎其微。正如樹木專家話齋，平時出街喺馬路吸入嘅廢氣危害更大，康文署完全係杞人憂天。

相反，強摘果實會令木棉樹出現大量傷口，引起真菌感染導致樹枝腐爛，隨時脫落，對市民威脅更大。康文署應做唔做，唔應做就亂嚟，簡直九唔搭八。話時話，夏日蟬鳴對市民滋擾仲大喇，康文署官員不如齊齊去捉蟬吖，笨！

好嘞，畀人狂插之後，康文署終於知衰，最近頒布處理木棉樹果實指引，聲稱除非構成極大滋擾而其他處理方式又失效，前線人員同承辦商唔可以因為有人投訴棉絮滋擾，隨意摘除木棉果實喎。即係話，署方以往完全係多此一摘，殺錯「良花」。

講起應做唔做，又點只康文署係咁吖，樹木辦同樣不務正業，護樹不力嘅咋。呢個衙門話就話專責管樹，防止再次發生塌樹死人慘劇，弊在成立以來毫無貢獻，大樹古樹照樣冧完一棵又一棵，壓死人嘅慘劇照樣不斷發生。無計喇，樹木辦勘察樹木敷衍求其，舊年有職員被踢爆四粒半鐘之內居然可以巡查一萬七千棵樹，人哋一眼關七，佢就一眼關萬七，仲兒戲過走馬看花，有乜可能發現問題吖。

康文署辣手摧花，樹木辦變「廢柴辦」，兩個衙門都係一擔擔嘅喇。計太一叮話齋，旨意呢班港產官僚做嘢，真係花草樹木都死快啲，叮！