Sun奇古怪：Sun潮語【戀殖】

今日係龍年最後一日，唔知你今年過得好唔好，但作為香港人嚟講，香港社會2012呢條龍，就真係「亂晒大龍」。政治不靖，經濟不長，爭拗不斷，船沉大海……天不時、地不利、人不和……可謂無日安寧。記得年初三車公支籤話香港「人鬼兩不分」，果然幾靈！香港人今年真係捱到人唔似人，鬼唔似鬼，真係期望嚟緊蛇年能夠轉轉運。香港如果再差落去，相信只會令到更多人扯起支「龍獅旗」，更多人「戀殖」！

「戀殖」呢個潮語，近年先會講，因為「戀殖」肯定係回歸後先至出現。「戀殖」係指一啲香港人「依戀英國殖民地時代」嘅簡稱，係一種情意結。

通常「戀殖」嘅人都會對殖民地時代留落嚟嘅嘢萬分依戀，包括維多利亞式嘅舊建築，英國feel嘅街道名，英式傳統，最重要係依戀，英治時代香港嘅好日子！係咪真係好好？就見仁見智。但係，英國人留畀我哋嘅三權分立，自由、司法制度等等……又真係好值得人依戀！尤其係呢啲嘢，自回歸以嚟，15年不斷好似潮浪淘沙一樣，一點一點咁溜走……

最近喺網上流傳一段英國駐香港及澳門總領事吳若蘭女士，今年向港澳拜年嘅短片。片中呢位英國淑女以廣東話，祝願我哋呢個前殖民地嘅遺民新春進步。就喺呢個中港矛盾去到臨界點嘅時候，出一條咁嘅片。真係令人有回到英國殖民地時代嘅幻覺！感覺就好似97回歸從不存在，2013新港督係一位典雅嘅英國淑女，芳名若蘭，更入鄉隨俗寫中文揮春，用廣東話同市民拜年，感覺虛幻！喺呢個時刻搞啲咁嘅嘢，真係唔可以唔佩服英國人政治智慧之高，老謀深算到極！再諗番香港呢十幾年所受嘅一切一切……講真……都真係令人有啲「戀殖」!