政壇：政商定格：趙樓神教投資要似靈蛇

有「K金大王」之稱嘅珠寶行總裁胡楚南日前提早搞春茗，一如既往請咗「趙樓神」長實執行董事趙國雄出席，記者當然要捉住佢幫樓市把把脈啦。趙樓神話世上冇嘢會永遠上升，現屆政府已用最大努力增加土地儲備及住屋供應，預料樓市再大幅飆升嘅機會唔大。

佢又妙論蛇年經濟，話蛇嘅特性係靈活，建議大家睇準合適嘅投資機會就要出擊。但佢又話蛇另一個特性係會冬眠，叫大家見到有乜唔妥就要學蛇咁靜止不動，忍忍手等待機會喎！

當晚胡楚南新抱、珠寶行董事總經理Carmen王凱曼穿上黑色露肩晚裝，手上嘅巨型嫣紅色碧茜戒指好搶鏡。佢話當年慈禧太后都鍾情呢種寶石，價錢比紅寶石平一截，鮮艷顏色仲切合中國人愛喜慶嘅傳統添！