政壇：鼠王芬當蔣麗芸小學雞

喺上屆立法會發表過唔少惹火言論嘅西九新動力「鼠王芬」梁美芬，單係「懲罰選民論」都辣慶唔少人，但今屆連任後發言用字就溫和咗好多，反而講嘢似阿媽教仔嘅建仔新丁Ann蔣麗芸就火速走紅。點知鼠王芬就話一啲都唔介意被人搶風頭，事關佢已做過一屆議員，依家好似睇番小學生一年班咁話。莫非佢想話自己升咗呢，暗踩阿Ann仲係小學雞一年班？

鼠王芬解釋，話自己做咗一屆議員，好多嘢都有經驗，知道要點處理。至於驚唔驚被頻頻曝光嘅阿Ann搶晒風頭，鼠王芬就話新丁通常都會成為焦點，依家大家轉移視線去阿Ann度，佢反而可以專注做多好多嘢。

喺政圈知己知彼好緊要，咁啲九龍西街坊又點睇阿Ann呢？鼠王芬話市場好大，大家都有唔同支持者喎。佢又話今屆咁多新丁之中以工聯會郭偉強同白鴿黨胡志偉表現最好，兩個發言都算唔錯，其中郭偉強仲夠晒勤力，好多無跟開嘅議題都好快上手。