政壇：苗祺鈺聲討刁民搞搞震

自稱國術團體嘅「東方體育會」館主連同幾位教練，帶埋大鼓現身維園正門耍拳，吸引一班行年宵嘅市民圍觀，但大家愈睇愈一頭霧水，究竟年廿八無端端做乜當街耍拳兼派傳單呢？

喺現場大耍自創宇宙拳嘅東方體育會館主、富士通香港總代理新暉電腦主席苗祺鈺解釋，佢哋係睇唔過眼社民連立法會議員「長毛」梁國雄等人，成日喺莊嚴嘅立會掃枱、掟嘢、發爛渣，希望藉耍拳聲討呢班惟恐天下不亂嘅刁民！對白聽落似乎同支持特首梁振英嘅團體差唔多，旋即惹來收錢耍拳嘅猜測。

苗祺鈺即時無名火起，自稱坐擁十幾廿億身家，連體育會嘅教練都坐底月賺兩、三萬元，豪言「唔使收人三百蚊遊行囉！」佢更澄清會館絕對獨立、無黨派，反指泛民政黨「賊喊捉賊」，直言佢哋受外國勢力操控，發起遊行示威荼毒年輕人「以為香港就快玩完」，形容佢哋運用兵法中「亂其心、喪其志」招式，令港人自亂陣腳。

佢又話不滿部分挺梁團體嘅「挺梁」聲勢唔夠激，所以佢先忽發奇想，藉耍拳宣揚強身健體嘅重要性，同畀其他人知道「唔係個個都反中國」，若果反中亂港行為持續，只會迫使佢出手替天行道、儆惡懲奸！