政壇：林鄭行花市鍾情君子蘭

政務司司長林鄭月娥尋日去咗天水圍天秀墟，喺嗰度食咗一粒魚蛋喎！點解有一粒魚蛋食呢？皆因佢行到熟食檔時，突然話淨係想食一粒魚蛋，所以就買咗一串，而食剩嗰啲就由同行嘅兩位陳太包底，即係民政事務總署署長陳甘美華同東華三院主席陳文綺慧囉！

跟住林鄭喺天秀墟買咗啲印尼小食同乾魷魚，之後就去咗荃灣沙咀道公園行花市喇！買完花，又買畫，最後仲特意幫襯一班大學生買咗個暖手枕。其實林鄭一去到花市，就到一個蘭花攤檔睇花，問檔主各蘭花品種嘅名，睇過蝴蝶蘭、彗星蘭同君子蘭，最後用咗近九百元買咗盆君子蘭。

翻查資料，原來君子蘭嘅花語係「高貴、有君子之風；有才而不驕，得志而不傲，居於谷而不自卑」，莫非林鄭覺得自己似呢種花，所以對佢情有獨鍾？不過聽聞呢種花忌高溫，政府呢個熱廚房係咪適合君子蘭生長o架？