政壇：李慧琼自認怪獸家長

港大民意研究計劃日前公布行政會議成員最新評分，建仔Starry李慧琼評分僅次葉劉淑儀、林煥光同羅范椒芬，Starry作為行會新丁能夠排第四經已相當唔錯。不過Starry慨嘆自從進身超級區議會同行會後，工作量係「史無前例咁多」，一向出名係廿四孝媽咪嘅佢更被迫打破對囡囡嘅承諾，唔能夠每晚都趕及九點半返屋企陪囡囡。

呻少咗親子時間

建仔家庭事務委員會尋日茶敍，多個父母級委員都爭住呻苦，話工作太忙搞到少咗陪子女，惟有各出奇謀爭取同子女相處嘅機會。身為委員會主席嘅Starry分享同囡囡相處之道時笑言，每晚都會堅持講故事畀囡囡聽，早上亦會爭取時間車囡囡返學。

港爸、港媽為咗小朋友唔好輸喺起跑線上，都變身「怪獸家長」力谷小朋友琴棋書畫樣樣精，Starry就自爆曾經好抗拒做怪獸家長，但眼見其他小朋友嘅履歷比囡囡嗰份更厚更精彩，亦惟有屈服成為怪獸家長一員，要求囡囡除咗學好中英文外，課餘亦要學彈琴同游水，但佢堅稱自己唔係「怪獸中嘅怪獸」，對比有家長力谷子女學十一項課外活動，「怪獸」程度真係小巫見大巫喇！

湊仔經愈講愈興奮，無意中更發現家委會好多委員都係「多仔公」，副主席鄭泳舜係三子之父，委員洪錦鉉、林心廉同周轉香都係生兩個仔，Starry笑言家委會咁旺丁，除咗方便幫囡囡搵另一半外，更建議想生仔嘅建仔成員快啲加入家委會添！