SUN搞作：打橫嚟講：年宵花市 政治力場

到維園花市行了一圈，直覺，嚟緊的一年，香港人將會不好過！

自二○○○年打後，這兒的年宵市場，已成為本地政治角力場。不特止高官扮親民，遊花市，消費幾斤嘢，做公關show外，上一上鏡，但弊在阻住人做生意，擾民多過贈興；其次，就係各大小政黨都投個小攤位與眾同樂，窮的政團，藉此籌款；富貴的，就派人坐鎮寫揮春送街坊，志在拉關係。

除此之外，近年，亦多咗好多自家設計的產品，這類貨色的特別之處，是以諷刺政治人物為主，客氣的，會印製成紙啤牌或者T恤寸吓佢，抵死的，就試過將老懵董卡通樣印製底褲，亦有將貪曾個樣印落廁紙度，畀機會佢食蕉。唉！遲啲可能會在年宵市場賣衞生巾矣！

這一年一度的花市，肯定是個政治角力的戰場，君不見有人惡意爭投支聯會二十幾年來的「常駐地」嗎？據說用重金「佔領」咗支聯會另一半陣地的大款，有大陸背景，如果是真的，那呈現了甚麼玄機呢？支聯會本想趁年宵籌點錢，買個竇做「永久六四民運紀念館」，如今，那豪客用錢攪局，還違法的分租轉讓兼利用一間學校擺檔，已去到目無法紀、肆無忌憚的地步，這類粉皮，最有資格做人大政協！這就是政治行為囉！

今時今日的香港人，自求多福吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府