政壇：政商定格：陳少平同記者對賭票房

外匯市場嘅刺激性，絕不低於股票市場，唔夠膽博嘅，好難做到成績，中國銀行（香港）總經理及投資主管Chordio陳少平係行內前輩，佢形容舊時交易員賭性好強，由天氣、球賽、八卦新聞到電影票房都可以賭一餐，雖然佢唔好賭，但佢都即席同記者開咗個賭盤玩下，考下坊間兩套好熱門嘅電影票房，一個睇好一個睇淡，長倉對短倉，邊個贏要過埋農曆年嘅檔期至知喇！

其實做外匯係一門好刺激嘅行業，Chordio話香港時間下午四時至十一時為全球匯市最旺嘅時段，若碰上公布重要數據嘅日子，交易員更會逗留至晚上兩、三點左右。講番以前啲外匯交投奇高嘅大時代，佢話嗰個年代嘅交易員壓力好大，故亦容易沾上惡習。當然，Chordio唔係好賭，今次只係同記者鬥吓眼光！