政壇：搞搞政：高達避白鴿自搞智庫

白鴿黨早前改選，由劉慧卿做主席後，黨內幾隻老鴿都有「去白鴿化」味道，一來想擺脫卿姐魔爪，二來唔想再背負黨嘅負資產色彩。老鴿「高達」李永達尋日就「另起爐灶」，成立咗個由佢做主席、專講房屋土地政策嘅智庫組織「土地監察」，唔止即時建議五招防止發展商囤積私樓，仲叫記者第日有乜嘢房屋問題隨時搵佢回應。唔通佢想復出政壇？

高達講明另搞新平台非為選舉鋪路，只係諗住新組織可專心研究房屋政策。組織成員來自五湖四海，背景既有公共專業聯盟又有白鴿黨成員，總之個個係專業人士。佢建議嘅五招，包括發展商要喺取得預售樓花同意書後一個月內公開發售，亦要列明價單、銷售數量。地政總署就設立資料庫，邊個發展商唔肯賣樓囤貨，公眾一目了然。

點解佢唔喺黨內提出呢？佢話組織嘅成員得十個人左右，每隔兩星期就食飯兼開會，機動性同靈活性好高，唔使好似以前咁，乜嘢建議都要經黨內中常委通過至得喎。哦，即係高達嫌白鴿黨機制太煩，所以寧願另起爐灶囉，明晒！