政壇：張震遠父食過東華愛心飯

東華三院最近出咗本《東華情深繫香港》新書，回顧百年來同港人甘苦與共嘅珍貴片段，尋日舉行新書發布會，運輸及房屋局局長張炳良、科技大學經濟系教授雷鼎鳴亦現身，原來佢哋係東華三院第三小學（東華三院李賜豪小學前身）嘅同班同學，諗起當年校園點滴，十分好玩。

書中提及六十幾年前，東華接濟因內戰來港嘅難民數以千計，其中包括行政會議成員Barry張震遠父親張寒松。佢與同袍曾喺摩星嶺殘破嘅軍營，接受東華每日接濟兩餐，書中仲擺放一張Barry同父親嘅珍貴合照。書中引述Barry話，父親逃難來港時佢仲未出世，但對東華救難民一事略知一二。書中又提到，當年食過東華愛心飯嘅，仲有著名工業家蔣震添！

諾貝爾物理學獎得主高錕夫人黃美芸亦有捧場，佢話高錕定期接受東華專為腦退化症長者而設嘅智圓全服務，由初時唔合作到依家玩得好開心。