政壇：吳亮星暗鬧長毛霸公屋

政府開始「全民搵地」嘅工作，其中一招係房屋署會加強取締濫用公屋戶。立法會金融界代表吳亮星就提出口頭質詢並援引數字關注濫用公屋歪風，然後話鋒一轉提到部分超逾受助條件上限人士仍佔住公屋，更甚係丟空單位或出租單位牟利。

星爺更不點名指出：「某居住公屋人士屬中高薪族，多年來月入逾七、八萬元，以資產仍未『超標』為由佔住以公帑資助嘅房屋，對大量苦候公屋人士造成不公」喎。

「項莊舞劍，意在沛公」，雖然星爺名義上冇開名，但實際上同點名批評冇乜分別。眾所周知，社民連主席「長毛」梁國雄做咗立會議員多年都仲係住緊公屋，議員嘅人工至少有八萬元，加埋津貼逾十萬元，絕對係同星爺提及嘅公屋霸王特徵非常脗合。事實上，長毛上個月中承認政府派人審查佢個銀行戶口，又上門家訪。