政壇：駱駝媽怒睥嚇窒葛珮帆

啱啱喺上周末去咗中東亞布札比參加第二屆聯合國世界信息峰會立法會議員EQ葛珮帆，期間忙裏偷閒周圍去觀光。佢話參觀過專養駱駝嘅農場，好開心睇到兩隻啱啱出世無耐嘅駱駝BB，當佢想上前摸吓佢哋毛茸茸嘅背脊時，駱駝BB突然露出驚慌表情，駱駝BB嘅媽媽即時用超級兇狠嘅目光怒睥住佢，搞到佢即刻縮手唔敢摸，估唔到EQ敢摸鯊魚，但唔敢摸駱駝BB。

其實EQ今次係要帶本港代表團出席有「IT界奧斯卡」之稱嘅世界信息峰會，事關香港區作品喺本屆賽事中破紀錄奪得三個大獎及終極大獎。佢希望獎項可以喚醒港府多啲關注中小企喺科技行業嘅發展，包括檢討中小企創新科技發展基金嘅申請手續，同埋幫手開拓更多外國市場。