嚴打澳門洗黑錢 《好報》猛料快又堅

香港人話過大海，即係去澳門賭錢，咁內地貪官過大海，通常做乜嘅呢？除咗賭錢之外，佢哋仲有另一個主要目的，就係洗黑錢嘞，所以咯喎，澳門被稱為「超級洗錢機」，真係一啲都冇講錯o架。

英國《泰晤士報》引述消息話，中央部署農曆年後展開新一輪反腐行動，最少有六個城市納入嚴打目標，澳門亦會牽涉其中。係人都知，澳門係洗黑錢天堂，貪官污吏遍及黨政軍各個層級，唔驚就假，所以唔少俗稱疊碼仔嘅博彩中介人早已聞風色變，人人自危，澳門賭業股尋日更加應聲逆市下跌添，睇嚟呢一波濠江反貪浪潮真係來勢洶洶o架。

唔講唔知，澳門回歸十三年，清洗過嘅黑錢估計超過十萬億港元，原來濠江最蓬勃嘅生意唔係開賭場，而係開「洗衣店」。北大人話，貪腐問題唔解決，隨時亡黨亡國，大家睇見全國貪官當澳門係挾帶私逃太平門，源源不絕將取自民脂民膏嘅巨額贓款匯走，咁搞法，中國就算唔滅亡，都遲早被抽乾啦，叮！

話時話，中央雷厲風行，部署打擊澳門洗黑錢活動，其實早就唔係新聞o架嘞，睇開《好報》嘅讀者兩個月前就知啦，收風仲快過澳門疊碼仔吖。嗱，上年十二月十四日，《好報》以「澳門變超級洗錢機」做封面故事，獨家披露濠江洗黑錢活動嘅種種內幕，其中最爆嘅內容係披露中央就薄熙來案秘密派出「欽差捕頭」南下澳門調查，喺澳門警方配合下調查多名懷疑替薄家洗黑錢嘅博彩中介公司高層，並押返內地進一步審問，同時內地亦有多人被捕，消息震驚各界。

事實證明，呢單內幕猛料完全有根有據，太一叮唔係賣花讚花香，《好報》消息真係又快又堅o架。都係嗰句啦，賭錢就話講運氣，做新聞冇得靠運氣，一切都係靠實力，《好報》之所以可以源源不絕將獨家猛料奉送畀讀者，主要因為有東方報業集團呢塊金漆招牌，同埋龐大而專業嘅採訪團隊，免費報根本望塵莫及。

講番打擊洗黑錢呢單嘢，希望中央今次嚟真嘅，唔好再虎頭蛇尾喇。至於後事如何發展，大家最緊要密切留意《好報》嘅報道，隨時又有獨家猛料送上，千祈唔好走寶呀！