政壇：政商定格：盧偉國鍾情清代古琴

工程界立法會議員盧偉國（WK）雖然予人嚴肅古板嘅感覺，但私底下佢卻係音樂發燒友，仲精通多種中西樂器，細細個學吹口琴，中五嗰年，又對琵琶彈奏《十面埋伏》念念不忘，會考後隨即報名學琵琶，學咗三個月，已被老師讚佢學識晒琵琶嘅基本功。

到大學畢業做咗工程師後，WK又喺偶然機會下向粵曲老師王粵生拜師學藝，學習粵曲南音演唱同拍和，依家WK收藏咗十幾把古琴，但佢最鍾意嘅都係清代仲尼式「天籟靈機」，又話呢把古琴係無價寶：「除非有好特別嘅理由要好多錢，否則我都唔會賣。」其實WK全家同音樂都好有緣分，佢太太同囝囝都醉心男女高音歌唱，主要唱意大利歌劇。不過，入咗立法會後，生活太忙，WK已經好耐冇彈過琴嘞。