政壇：搞搞政：波波夫婦換眼鏡勢轉運

發展局局長陳茂波做官之後是非多多，一陣捲入劏房事件、一陣又被指酒駕，最慘係連佢太太都成為追查目標，搞到佢同太太都要出奇招避麻煩。近日我哋就發現波波轉咗新look，睇真啲原來係換咗副新眼鏡，佢透露兩夫妻一齊換眼鏡，希望有新形象之餘亦轉吓運喎！不過，玄學家話換眼鏡對改運嘅效用唔大，轉個頭波波又因為軍營用地嘅回應搞到要出聲明澄清嘞。

波波忽然由戴開金絲細框眼鏡，同太太一齊轉戴深色粗框眼鏡，佢話因為雙眼嘅近視度數深咗，新眼鏡鏡框闊過以前，可以令佢睇嘢「闊啲」，睇落亦「精神啲」。呢副新眼鏡係香港製造，眼鏡臂可以垂直之餘，仲可以一百八十度扭開，但代價就係要使成一千元，波波都話覺得有啲肉赤。我哋問佢轉形象係咪想喺蛇年轉番個大運，佢大笑幾聲後淨係答咗「轉一轉」三個字。

玄學家楊天命解釋，眼鏡對改變一個人嘅運程只係佔好小作用，假如當事人覺得現時運程麻麻，換吓眼鏡只係心理效果大於實際喎。