政壇：陳啟宗話預算案要中庸

中國人好重視中庸之道，一向快人快語嘅恒隆地產董事長陳啟宗（Ronnie）似乎都係呢個原則嘅奉行者，尋日佢出席明天更好基金活動時，被問到點睇即將公布嘅財政預算案？甚至財政司司長曾俊華會唔會又估錯數呢？Ronnie回應時顯得好謹慎：「做預算案時要小心係啱嘅，但又唔可以過分小心！」

Ronnie係城中公認嘅梁粉，近嚟講嘢火藥味明顯少咗，佢話預算案既要小心、又唔好太小心，都反映咗一啲希望香港平穩發展嘅商界人士心聲，只係聽慣Ronnie一針見血嘅評論，忽然聽到佢咁溫和、咁中庸之道嘅言論，難免感到意外啫。