政壇：郭老大「搣柴」友好質疑

新鴻基地產非執行董事郭炳湘（郭老大）身邊嘅朋友，對郭老大突然冇得留低做全國政協常委，最近都接二連三對外發聲。郭老大身邊嘅朋友最近又有新講法，話前政務司司長唐英年其實依家亦正受因九龍塘大宅僭建事宜被廉政公署調查中，因此對佢最新獲委任做全國政協委員、甚至有機會做政協常委，產生好多質疑，反問大家點解唔去了解吓喎。

郭老大前前後後出任四屆全國政協委員，當中兩屆仲係做政協常委，呢個政治履歷喺親中人士中算係數一數二。不過，正如本報早前報道指，郭老大身邊嘅朋友對佢突然冇得留低感到莫名其妙，因為「郭老二」郭炳江今屆同樣涉及新地案，又可以連任上海市政協常委，依家郭老大朋友又提埋唐唐受廉署調查都可以做政協，睇嚟政協個制度真係出咗問題。

城大進修學院學術統籌宋立功分析，中央委任全國政協時有佢嘅政治考慮，包括政治方面正面同負面影響。究竟有關方面委任政協時，係咪真係有具體準則，呢個就真係天知地知，你同我都唔知道喇！