託兒服務不足 煩請官僚賣懶

賣懶賣懶，賣到年三十晚。今年無年三十晚，咁賣懶應該賣到幾時呢？唔……呢個問題最啱官場懶蟲解答，等勞工及福利局局長張建宗話畀大家知啦！

嗱，張建宗快啲回答呀，好多人等緊答案o架。有社區組織尋日提早同政府開年，抗議官僚作風苟且，對社區託兒服務不足問題一直闊佬懶理。示威者用賣懶歌當示威口號，用特製揮春當抗議標語，寓意嚇退纏擾官老爺嘅大懶蟲，畀貧窮家庭能夠再現生機。

話改善託兒服務係貧困家庭嘅生機，絕對無誇張o架。最新調查發現，全港資助託兒名額嚴重短缺，每一百名六歲或以下兒童只有不足八人享用，六至十一歲兒童嘅比率更加低至不足兩人。申請託兒服務輪候時間超過兩年，等得嚟班細路都大晒啦。

免費託兒名額少得咁可憐，收費託兒服務對窮等人家又係遙不可及嘅奢侈品，咁即係逼在職家長鋌而走險獨留子女喺屋企嘅啫，好多兒童家居慘劇就係咁樣造成！所以咯喎，社區組織警告，獨留兒童慘劇已成社會危機，加強託兒支援刻不容緩，要求當局派發「照顧兒童津貼」。

其實，就算撇開獨留兒童問題唔講，家長面對後顧之憂亦係困局。留家照顧子女咩，賴以餬口嘅微薄收入更加捉襟見肘；出去打工咩，怕違法收監，更怕子女出事。所以話啫，基層無法自力更生，唔係市民懶，係港府推卸責任，搞到託兒服務天殘地缺，基層脫貧又點睇到生機呢？

社區組織批評政府五宗罪，包括對照顧兒童缺乏承擔，鼓勵就業扶貧一味吹水，同埋家庭支援政策落伍等等。其實，使乜五宗罪吖，一宗罪就夠啦，就係懶！基層家庭長期投訴託兒服務不足，幼年子女都就快長大成人嘞，問題依舊十年如一日，證明港產官僚返工根本只係大覺瞓。張建宗，快啲講畀大家知，你哋要做大懶蟲到幾時？

賣懶嘅民間傳說係咁講嘅，王母娘娘嘅蟠桃樹上有隻大懶蟲，因為好食懶做而被打落凡間，專門寄居喺細路仔嘅鼻哥窿入面，成為一條鼻涕蟲。張建宗，如果你想證明無畀大懶蟲附體，咁就勞煩快快改懶歸勤，改邪歸正。香港自詡國際大都會，但託兒服務不足而釀成兒童獨留慘劇層出不窮，你哋知唔知醜o架？

唔使等年三十晚嘞，港產官僚即刻賣懶，改善託兒服務啦，叮！