SUN搞作：打橫嚟講：官員喪虧 港人囧爆

香港政府的舉措，常叫人O嘴加囧樣，嗱！為解決同打擊奶粉走私狂徒，香港政府可以高度到要驚動最高最高的行政首長，再層層責成，最終，有一個叫做「跨部門」（三局五部門）的組合，派出成群烏眉瞌睡虧佬款的頭頭，出嚟向世界宣布：「我哋終於有條絕世好橋，可以趕絕啲走奶水貨客！」咁有乜方法呢？燈燈燈鄧，就係建議修訂《進出口規例》，限制蟻民帶奶粉出境（包括搭飛機去荷蘭、澳洲同德國？）淨重不得超過一點八公斤（約兩罐），嘩！勁呀！天才至諗到的絕招呀！

無露面講奶粉問題的梁振英，也跑了出來，於傳媒鎂光燈下，不理背後被人喝叫下台，也煞有介事的直認用呢招對付水客係好「辣」！

有幾辣吖？香港政府早前咪話重手打擊樓價飆升，推出乜叉印花稅嘅！兩個禮拜不到，樓價咪不跌反升！畀我在此批中過啦！

呢兩日，確實少咗大陸人買奶粉，但此並非香港政府「辣招」有效，只是有大批網民聯署電郵向美國白宮求救，引起國際關注，嚇窒大陸佬咋！呢處講的大陸佬，不是指北京阿爺，而係深圳那棚有既得利益的腐敗官員，要佢哋在「阿爺未發火前」，拿臨自律兼收歛咋！睇住吖，咪畀我再估中，過完年，肯定又搶掠一番。香港政府之廢，係無長遠解決方法，今日係奶粉，明日係益力多，又點呢？遲啲，係沙糖、麵粉、豉油、生油……又點？只要大陸食品全部造假有毒，香港一日不好過，香港官員的虧樣，只會愈見愈虧，肯定的了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府