政壇：搞搞政：陳健波張華峰玩股兩極化

金融服務界議員張華峰同保險界代表陳健波出晒名係立法會內股壇高手，但講到投資哲學，佢哋就非常唔同。

陳健波係「鬥長命派系」，深信只要有充足資金，喺低位溝貨係成功秘訣，而且愈低位愈要守住，千祈唔好被大戶洗倉震走。佢話呢招用咗三十年，令佢唔少股票都由蝕變贏，另一秘訣係一定要有貨在手，否則唔會緊張市況。不過前提係手持優質股票，工商銀行、招商銀行等內銀股就係佢心水。

相反張華峰認為玩股票一定要識止蝕，向來唔玩溝貨，深信股票跌得多，即係入錯貨，如果有閒錢溝貨，不如買第二隻好過。至於止賺方面，佢認為可以定得大膽進取啲，贏少少就離場根本享受唔到大市升浪。

不過，佢哋亦有不謀而合之處，就係唔掂複雜嘅衍生工具，陳健波話自從七十年代試過玩認股證跌到渣都冇後，從此唔玩呢味嘢。張華峰亦話衍生工具可以扭曲現時股票價值，如果唔係專業投資者，呢啲嘢少掂為妙。仲有一點係佢哋都係唔玩孖展，從不借錢炒股。唔知大家聽咗咁多，有冇少少得着呢？