政壇：盧偉國政協升呢南轉北

因梁振英當選特首令「山東幫」近年人氣急升，連帶做山東省政協都多咗人關注，最近又有人喜獲「升呢」，講緊嘅係工程界立法會議員WK盧偉國。

WK喺舊年九月立法會選舉，成功擊敗多名對手，首度進身立法會，事隔唔夠半年再下一城，連政協委任都有進帳，佢由中山市政協「升呢」做山東省政協。

中山喺廣東省，一個南一個北，同山東除咗都有一個山字，完全風馬牛不相及，佢就話曾帶領業界到山東做投資推廣工作，並呼籲當地企業以香港作為跳板「走出去」。即係話，佢同山東都算係有淵源o架！

佢仲話有幾個老友一齊做山東省政協，包括有「清盤王」之稱嘅德勤企業重整服務亞太區合夥人黎嘉恩，同埋嘉瑞國際副主席兼行政總裁姜永正喎。其他較為人熟悉嘅山東省政協，仲有行政會議成員張震遠等。