政壇：AO鬥歌新舊高官齊力撐

香港政務主任協會前日首次舉辦AO（政務官）歌唱比賽，邀請晒十二局嘅代表參加，唔少新舊AO都現身撐老友，包括久未露面嘅商務及經濟發展局前局長Rita劉吳惠蘭同常秘蔡瑩璧。Rita年前因病辭職專心養病，當日見佢笑容滿面，相信佢嘅健康已冇乜大礙喇，而佢嘅「給力」相當奏效，比賽冠軍最終由商務及經濟發展局奪得。

擔任協會主席嘅「AO歌王」民政事務局常秘楊立門好落力，做表演嘉賓又做評判。參賽嘅財經事務及庫務局常秘區璟智同一班同事以「唱錢」搶鏡，一口氣唱咗三首同錢有關嘅歌，仲出動埋面具同道具銀紙，咁有心思，最終雖未能躋身三甲，但都賺到個最佳台風獎。