政壇：鬍鬚曾冇橋兼技窮

日本副首相兼財務及金融大臣麻生太郎早前揚言希望當地長者「死快啲」，引起國際嘩然，連財爺鬍鬚曾亦湊熱鬧「抽水」，尋日喺佢嘅網誌話，喺媒體報道得知麻生係超級漫畫迷，揶揄麻生嘅相關言論只會出現喺政治漫畫嘅設計對白入面，仲話作為「行家」，亦好想嘗試代入麻生嘅角色，睇吓係乜嘢驅使佢失言，認真係落井下石。

曾創錯估逾千億

講咗咁長嘅開場白，最後先係重點。眾所周知，新一份財政預算案喺今個月二十七日公布，鬍鬚曾喺網誌透露政府今個財政年度大豐收，除咗近三百八十億投資收益，連同賣地、印花稅收入增加嘅「意外之財」，截至舊年年底經已令庫房錄得四百億盈餘，較預計約三十四億元赤字相差一大截。

其實，鬍鬚曾年年估錯數已經畀人鬧爆，更曾創下錯估財政盈餘逾千億嘅「神話」，正當大家以為今年有糖派，「守財奴」鬍鬚曾緊接重申會堅守「應使則使」原則，強調政府開支每年都加，一旦「大花筒」使多咗就會影響投資收入，形成惡性循環。

鬍鬚曾任內錯估財務狀況達二千五百億元，每年平均差額六百幾億，即使喜訊連年亦以「量入為出」為由關水喉。

嗱！鬍鬚曾又喺度為計錯數嚟辯護，唔肯認衰，之不過，佢年年都係先做赤字預算，跟住出現大量盈餘之後，又再狼來了，一味靠嚇嚟壓低市民對派糖嘅期望，可謂攞住一個劇本走天涯，根本就係冇橋兼技窮，市民都睇到厭，又點會再信佢吖！