查冊淪為禁區 新聞自由玩完

年關將至，追討欠薪事件不絕於耳，內地係咁，香港亦係咁。內地官商勾結，工人追嚟追去隨時得個吉；而香港官商勾結雖然冇咁嚴重，但工人同樣係望天打卦嘅咋。

嗱，根據已刊憲嘅《公司條例》查冊新安排，如果打工仔日後畀人拖數，分分鐘有冤無路訴，事關新例禁止公眾查閱公司董事住址同身份證號碼。正如建造業總工會話齋，只有透過查冊至可以搵到欠薪公司嘅登記地址，如果查冊淪為禁區，打工仔隨時有汗出冇糧出，都唔知去邊度追討。

唔止工會有意見，中小企老闆對新例都好不滿o架，佢哋認為冇得查冊難以了解客戶背景，簡直綁手綁腳，嚴重影響生意。

其實，新例唔止剝奪公眾知情權，更嚴重妨礙新聞自由。面對一片反對聲音，財經事務及庫務局局長陳家強一味耍太極，話會考慮放寬有關規定，畀傳媒獲得豁免，又話何謂傳媒好難界定，必須「小心平衡私隱同知情權」喎。

叮！神又係佢，鬼又係佢，究竟「傻強」知唔知自己講緊乜o架？咪話太一叮踢爆，當局鬼鬼祟祟通過《公司條例》，保障私隱係假，阻撓新聞自由至真，佢哋無非想限制傳媒採訪，等政府可以黑箱作業，為所欲為啫。

話時話吖，打壓新聞自由，剝奪公眾知情權，當局唔止一直做緊，而且愈嚟愈露骨添。近年政府巧立名目，不斷推出阻礙新聞採訪嘅措施，警方同消防相繼熄機、新聞處選擇性發布資訊、核心保安區愈設愈多、記者採訪區愈縮愈細，家陣連查冊都禁止，簡直係無所不用其極！

正因為港府倒行逆施，搞到本港新聞自由不斷倒退。呢，前排「無國界記者」公布最新新聞自由排行榜，香港排名繼舊年急跌二十位之後，今年再跌四位，下滑至第五十八位，低處未算低，畀台灣愈拋愈遠，真係醜死怪。當局口口聲聲保障新聞自由同市民知情權，實情係不斷搞小動作，破壞香港嘅核心價值！

公眾利益冇價講，新聞自由大過天。如果公眾冇得查冊，官商勾結就會肆無忌憚，貪官污吏就會為所欲為，例如曾蔭權爵士咁，傍住有錢佬黐飲黐食，遊山玩水，都可以神不知鬼不覺，冚到密密實實。嗱，太一叮要提醒班港產官僚，查冊淪為禁區之日，就係香港核心價值玩完之時，千祈唔好做歷史罪人吖，叮！