SUN奇古怪：Sun潮語【跳掣】

喺香港地生活，真係人都癲。彈丸之地本來已經人多車多逼到嘔，加埋一浪接一浪嘅個人遊好似海嘯咁湧入嚟，仲要不斷進行資源搶奪，搶奶粉搶學位搶檸茶搶益力多，搶呢樣搶嗰樣……搞到今時今日香港BB連搵啖奶飲吓都咁困難，要啲老竇老母走遍全港撲奶粉！政客政棍膠官霸權，日日玩到我哋啲市民陀陀擰。喺呢個連卡夫卡都寫唔出嘅荒謬世界生活，身處可能連村上春樹都諗唔明嘅冷酷異境，香港人真係隨時黐線，搞到個腦「跳掣」都唔出奇。

「跳掣」本來係形容電線短路，即係燒咗fuse，又或者係老人家口中嘅「燒灰屎」。咁點解個「掣」係會「跳」嘅呢？係因為以前啲人，通常會叫控制全屋電力嘅電箱做「大掣」，當電線短路嘅時候，電箱個開關會自動由On跳去Off，加上舊式電箱個開關掣，外形又真係幾大。所以「跳掣」呢個港式俗語就係咁樣嚟。

潮語 「跳掣」就係解一個人個腦有問題，即係突然Short咗，係真係患上精神病要睇精神科嗰種，就稱為「跳掣」或「跳咗掣」，係一件幾大鑊嘅事。

值得一提係用「Short咗」形容精神病，係由八十年代一套電視劇開始，已經有好耐歷史。因為短路英文叫Short Circuit，如果個腦神經短路，就即係個腦壞咗，咁就即係Short Circuit咗。相信「跳掣」亦係基於呢個原因，而被用作為潮語。

不過「跳掣」亦有一啲無咁嚴重嘅解釋，就係話一啲經常要muti-tasking，一個人同時做緊十樣唔同嘅嘢，個腦經常要跳來跳去咁思考。好多時呢類人都會答非所問，又或者同佢哋傾緊A，突然又會跳去講B，經常性地九唔搭八。呢啲情形，都會喺一啲思想快速或從事創意工業嘅人身上出現。講真，我都係經常「跳掣」嘅人士，唔知使唔使睇醫生呢？