政壇：搞搞政：黃錦星「年年冇餘」要環保

年近歲晚，好意頭嘅說話響徹街頭巷尾。環境局局長黃錦星有「綠色建築師」之稱，尋日講到新年祝願，KS預祝大家豐衣足食之餘，更提醒大家「年年有餘」嘅概念係時候轉一轉，唔一定有嘢剩先係好事，齊齊惜食積福更好喇。

黃錦星仲強調，佢二十年來喺屋企食飯都係一粒米都冇剩，除咗桌上「零廚餘」外，就連湯渣都例必清乾淨，唔怪得佢笑言屋企煲咩湯都要經佢首肯，揀啱佢口味先准煲！佢呢套環保意識雖然好正確，但叫人改變吓對年年有餘嘅渴求又實在冇必要。因為小市民求「年年有餘」根本同餐餐有飯剩無關，而係希望入多過出，收入有餘先可以累積，基層小家庭亦有望憑此脫貧。

同場仲有另一個環保達人前天文台台長林超英（黑英），佢夏天唔開冷氣外，平日沖涼亦唔用番梘。尋日佢又憶述細個食飯經常被告誡一粒米都唔好食剩，否則大個咗就會生瘌痢，呢個咁唔科學嘅訓示明顯係靠嚇，但黑英都建議學校用呢個方法教育學生唔好食剩飯哦。