政壇：嚴志明數港青弊病

唔少人都話香港青年似乎愈來愈激、愈來愈多怨氣，由年前嘅菜園村爭拗到每逢大遊行後就有激進分子瞓街、阻街都可見一斑。有啲人把脈，話同今時今日青年人缺乏出路有關。尋日香港青年工業家協會同青年議會搞咗個論壇，協會副會長、創立咗辦公室家具品牌嘅工業家嚴志明認為唔少港青好似溫室嬌花、冇面對過困難，而呢個問題又同家長嘅態度有關。一眾怪獸家長真係要反省吓。

見工都要父母陪

尋日嘅論壇名為「青年發聲@青年人向上流．向下流」，大會都話，香港地競爭激烈，依家即使係高學歷嘅青年人要向上流動都面臨唔少困難，而政府嘅政策又未必可以照顧每一個年輕人嘅特別需要，所以邀請啲嘉賓同青年人分享向上流嘅奮發心得。

創立咗著名辦公室用具品牌嘅嚴志明就睇到一啲港青嘅弊病，佢話本港唔少父母早年或因自己吃過苦嘅關係，就將享受留畀子女，以致唔少港青都喺溫室中成長，唔識應付難題，遑論面對困難。更有父母連子女去面試、見工都要陪同，溺愛到呢個地步，子女只會更加倚賴佢哋，無法為自己嘅人生做決定。

嚴志明喺英國曼徹斯特大學及劍橋大學修畢建築學士及碩士，早年赴英留學，嘗盡人在異鄉、孤獨苦學嘅滋味，難怪佢睇到弱不禁風、無法獨立嘅港青咁有感觸。怪獸家長問題近年已經喺學界引發唔少關注，睇嚟想要解決港童、港青問題，首先要解決怪獸家長問題！