唔怕奶粉荒 最怕失失慌

嘩，保安局局長、運輸及房屋局局長，加埋食物及衞生局局長，三個問責官員齊齊上陣，輪流開腔，乜嘢事搞到咁大陣仗呢？原來係為咗奶粉荒嘅問題。

多個部門尋日舉行聯合記者會，公布一系列打擊跨境水貨活動，確保奶粉供應措施，包括制訂旅客監控系統拒絕懷疑水貨客入境、港深兩地聯手打擊水貨客、檢查懷疑攜帶過量奶粉過關旅客行李、收緊東鐵行李重量限制、喺部分車站加裝行李地磅、離境人士只准攜帶兩罐奶粉，以及設立電話熱線協助本港家長訂購奶粉等。話就話多管齊下，但效果如何，仲要睇過至知。

又難怪當局咁大陣仗嘅，近排部分奶粉供應出現短缺，加上網上炒作，有人將問題政治化，加劇恐慌情緒，水貨客同本地媽媽鬥搶奶粉，搞到亂象叢生，怨聲載道，為中港矛盾火上澆油。面對呢個亂局，當局一直束手無策，進退失據，因而備受非議，今次終於不得不出手，梗係大陣仗喇。

所以話，弱勢政府百事哀，連奶粉問題都搞到一鑊泡，都唔知好笑定好嬲。呢，有人建議將奶粉列為法定儲備商品，實施出口管制喎。呢招辣就夠辣嘞，最怕隨時弄巧反拙，得不償失。眾所周知，香港奉行自由市場經濟，如果政府郁吓就以行政手段介入商業活動，郁吓就限制出口，影響本港國際形象事小，自毀根基事大，千祈要三思吖。

試諗吓，如果一有風吹草動就限制呢樣禁止嗰樣，咁同內地過去計劃經濟嗰套有乜分別？正如有人話齋，水貨客逐利而為，內地需求愈來愈龐大，今日搶奶粉，聽日可能搶豉油，唔通到時又將豉油當儲備商品禁止出口？係咁嘅話，香港呢個自由港豈不是變成管制港？

唔怕奶粉荒，最怕失失慌，如果當局矯枉過正，因噎廢食，咁就大鑊嘞 。話時話吖，要解決奶粉荒，唔可以病急亂投醫，而係要對症下藥，從保障供應，打擊水貨活動入手。當務之急，係保證本港嬰兒所需奶粉供應充足，唔會斷貨；同時，要加強監管落實打擊水貨活動措施，唔好講完就算數；而更重要嘅係，必須從嚴處置囤積居奇，坐地起價嘅行為。

嗱，咪話太一叮唔提醒吖，新春佳節將至，又到中港口岸出入境高峰期，千祈要打醒十二分精神， （目及）緊水貨客，嚴格執行新例，如果繼續懶懶閒，遲早跪低收場，咁就神仙都打救唔到咯，叮！