SUN奇古怪：Sun潮語：【堅抽】

Dream Bear最近真係紅到發紫。自從佢接受某雜誌專訪爆大鑊之後，全港電視電台網台大小報章雜誌facebook互聯網討論區，日日「熊出沒注意」，搞到全港市民患上「bear熊熱」。佢仲夠膽死同人賭命，以生命作賭注，呢隻熊膽嘅汁，肯定係非常值錢，唔知國內熊膽汁生產商有無興趣，研究吓佢身體到底咩構造呢?姑勿論佢講嘅嘢堅定流，佢至少已經連全國政協委員個位都保唔住。無官一身輕，佢今後大概可以爆得更放更盡，有好材料唔好收埋，再爆多啲料益吓街坊，等我哋呢啲花生友，多幾場好戲睇，咁都係曲線造福市民，咁佢就真係 「堅抽」啦!

潮語 「堅抽」其實有兩個意思，第一個係 「堅係勁抽」嘅簡短版，即係形容有啲人或有啲嘢，真係強勁到無朋友，但同時可褒可貶。例如好似話啲大陸水貨客真係「堅抽」，可以令到我哋堂堂國際大都會鬧奶粉荒，特區政府應該 「堅抽」打擊水貨客，咁樣先至夠 「堅抽」!由此例子可見， 「堅抽」呢個潮語用途係非常百搭。又舉多個簡單例子: 電影《一代宗師》真係 「堅抽」!拍咗十幾年，但我真係「堅抽」睇唔明，不過章子怡真係 「堅抽」咁靚，朝偉都算打得 「堅抽」!由此可見，「堅抽」確係 「堅抽」好用!

「堅抽」另一意思係 「堅係抽水」咁解，即係話有啲人嘅說話或行為，成日佔人便宜。例如城中著名才子，晚晚喺大氣電波抽水，佢 「堅抽」到除咗「堅係抽水」外，仲要係抽得應棍，抽得夠堅，抽到大受歡迎，果然係一代才子，真正一代宗師。老老實實，香港地以抽水為生嘅人真係唔少。我哋當然係其中一分子。行文至此，呢篇嘢都係不斷咁抽呀抽，抽到乾塘……