政壇：政商定格：馬雲豪派錢員工過肥年

辛苦咗一年，阿里巴巴集團嘅員工近日終於聽到好消息！事關集團主席馬雲宣布，員工除咗有年終雙糧、年終獎及期權獎勵之外，仲準備向全體員工派發特別紅包。

雖然馬雲冇講呢個紅包有幾大封，但就透露視乎員工喺阿里巴巴年資而定，但相信啲獎金加加埋埋，都夠每位員工過番個肥年嘅。

阿里巴巴舊年經歷完B2B私有化，又要進行業務整合重組，5月個時仲同雅虎簽訂回購20%股權嘅協議，真係忙足全年冇停過手。所以馬雲宣布好消息都一浪接一浪，佢話今年唔單止會加人工，如果集團繼續表現理想，就會延續13個月年薪的做法，即係年年都有雙糧出。