政壇：政商定格：陳振邦唔怕囝囝冇奶飲

城中父母近日忙於撲奶粉，莎莎國際太子女郭詩慧（Melody）同丈夫陳振邦（Davis）日前帶埋囝囝頌言（Jacob）現身公開活動，講起嬰兒奶粉，Davis好淡定話冇有怕，皆因佢囝囝飲嘅係美國奶粉，內地人唔係咁識買，所以貨源相對穩定。加上其公司現時代理多個奶粉牌子，想食邊隻都得啦！

九個月大嘅囝囝白雪雪、肥嘟嘟好可愛，兩夫婦透露Jacob好為食，已經開始進食固體食物，做父母嘅不時會拍拖去超級市場買啲有機蔬菜、水果同肉類，炮製愛心營養餐。Davis話囝囝鍾意笑，活躍又貪玩，依家返緊playgroup，開始識得辨別monday至sunday、weather & season等英文喇。問佢哋幾時為Jacob添個弟弟或妹妹？Davis就話順其自然喎。