政壇：搞搞政：推15年免費教育 吳克儉一味靠拖

施政報告經已出爐，喺教育方面，上屆政府講到慶合合嘅十五年免費教育變咗要研究，臨門一腳竟然縮番轉頭。教育局局長吳克儉尋日喺立法會回應致謝動議時，就死撐當局對十五年免費教育嘅立場冇變，亦唔係政府信心動搖。佢又拋出兩年時間表，話希望委員會喺兩年內完成研究，咁講法，香港要喺二○一五年實行十五年免費教育都真係癡心妄想喇！

新一屆政府話要成立委員會，就十五年免費教育展開「研究可行性」，吳克儉話呢個決定絕對唔係轉軚，只係政府推行新政策前必須有充分嘅考慮，而且個委員會轄下會設唔同嘅小組，佢強調幼稚園教育對香港嘅未來發展好重要，影響絕對唔會比高中學制嘅改革細。

但最後佢嘅尾巴都露咗出嚟，佢話政府要小心行事，期望專責委員會用兩年時間嚟研究，咁講即係二○一五年底先有結論，就算結論正面，推行得嚟睇怕又要拖一兩年，香港行十五年免費教育，真係冇十年八載都唔使諗。