政壇：港富二代爭做省市政協

內地各省市呢幾日公布最新嘅省市政協名單，似乎呢類省市政協大有變成本港富二代俱樂部嘅趨勢，當中又以北京同天津市政協係本港富二代嘅大戶，究竟有幾多人真係有心做好建言獻策工作，相信佢哋自己心中有數。

新一屆全國政協委員日內公布，政商界爭崩頭想分一杯羹，暗中部署第二、三代子女提早「升呢」，即使因各種原因暫時未能如願，都着力爭取有關方面委任為省市政協。據聞除咗兵家必爭嘅北京市政協外，近年天津亦成為熱門，港協暨奧委會會長霍震霆之子霍啟剛、新世界發展主席鄭家純之子鄭志剛、莊士集團太子爺莊家彬等，最近都獲委任做天津市政協。

至於北京市政協，富二代同名人之後更係不計其數，地產界就有「四叔」恒基地產主席李兆基兒子李家誠、信和置業主席黃志祥兒子黃永光，另外立法會內務委員會主席梁君彥嘅兒子梁宏正亦係其一，究竟一眾富二代係有名有實定係有名無實，大家真係要金睛火眼(目及)實嘞。