政壇：鄧家彪做學神好緊張
工聯會立法會勞工界議員鄧家彪（Bill）進身議會後，因為經常要穿梭東涌區議員辦事處同金鐘立法會，為咗節省交通時間，咪同太太決心學車，希望蛇年進身有車階級，日前佢就去咗九龍灣一帶學車。
學神Bill依家跟緊工聯會駕車教師分會嘅教車師傅學車，當日佢先駛到九龍灣啟興道學三手軚窄路掉頭，慢車操控問題不大。不過，後來到祥業街一帶街道兜圈練習駕駛時，由於沿路有唔少大型貨車穿插，學神Bill顯得有啲緊張，搞到教車師傅都緊張埋，即時伸隻手過去扶住學神Bill個軚盤。阿Bill話學車後終於明白到點解做司機要一眼關七喇。呢一日原來係佢第二堂課，嚟緊嘅三月就要考路試，希望佢一擊即中啦！
鄧家彪三十幾歲做學神，希望蛇年考車一擊即中。