政壇：貝鈞奇嘆港足運難發展

好多港人都鍾意足球，但本地球壇盛事—賀歲盃對唔少球迷卻欠吸引力，香港足球總會董事貝鈞奇日前出席活動時都慨嘆，積弱已久嘅香港足球運動唔止難吸引優秀球員，就連邀請外隊來港較量亦唔容易。佢話邀請外國勁旅來港，單係戲金就動輒索價數百萬美元，憑票房收入根本難以填補，加上欠缺「大水喉」支持，實在難以借助與外隊較量嚟提升本地足球水平。

貝鈞奇又話，本地足球賽事欠吸引力導致票房收入欠佳，球會無法向球員提供優厚待遇難以招攬人才，目前球員嘅月薪只得約一萬多元，同九十年代球員可以月入四萬元比較真係雲泥之別，所以少人投身足球事業係可以理解嘅。佢慨嘆日本大企業願意慷慨贊助當地球隊，令日本足球茁壯成長，但香港就欠缺呢種文化，球會艱苦經營好難突破困局，雖然政府曾提出以鳳凰計劃振興足運，但可惜目標過於理想，跟現實存有落差。