政壇：白鴿議員焗住清腸胃

「貪曾」前特首曾蔭權爵士在任期間貪盡海陸空，就連約見立法會各黨派議員都要去食好嘢，最廣為人知就係與沆瀣一氣嘅民主黨（白鴿黨）議員結伴去鯉魚門大擦貴價海鮮，又鮑魚又響螺湯。自特首梁振英（CY）上場後，約會議員多數係去禮賓府食早餐交流，而且仲係食清淡早餐添。尋日白鴿黨五人都應邀去食早餐，單仲偕都話好簡約。

笑談「敵我矛盾」

根據單雞所講，CY請佢哋食嘅早餐先有水果拼盤，之後就有粟米肉碎粥、蝦米腸粉同油炸鬼，相比貪曾約佢哋去鯉魚門歎海鮮，CY呢餐真係踏實又經濟。

內地公帑吃喝之風令人睇到眼火爆，香港雖然冇呢一套，但貪曾時期，同政黨會面嘅飯局都相對豪，或者對於食慣好嘢嘅白鴿黨議員嚟講，尋日嘅早餐可能唔係好慣喇。

其實，呢啲工作性質嘅早餐會，如果一味掛住風花雪月、飲飲食食嘅時間仲多過討論實事，起到幾多作用呢？最怕就係酒肉穿腸過，正事拋腦後。

白鴿黨主席劉慧卿話，會面時該黨主要同CY討論政改問題，之後大家都有就房屋問題及空置稅交換意見。

卿姐仲喺早餐會上提出，如果CY想多啲同泛民合作，就應該喺制訂政策時多啲諮詢佢哋意見喎。佢又問CY有冇講過同泛民係「敵我矛盾」嘅言論，CY聽到後都有笑住回應，但回應咗乜嘢，卿姐就叫大家問CY喎！

政壇吹新風，一眾白鴿會唔會掛住海鮮大餐多啲，就要問佢哋至知，但潮流興簡約，政界人士普遍又酬酢太多，食清淡啲係好事喎！