貪曾死雞撐飯蓋 可憐只剩一張嘴

開講有話，好夢由來最易醒。新一屆全國政協委員名單敲定，曾蔭權爵士榜上無名，升上神枱做國家領導人嘅春秋大夢宣告破滅。正所謂，眾望所歸，冇得留低，呢個結果完全係意料中事，貪曾臭名遠播，身敗名裂，如果咁嘅貨色都可以做國家領導人，就真係天冇眼咯。

人貴有自知之明，貪曾自食惡果，自絕於人，連中央都拋棄佢，照計應該死心喇，點知佢面皮厚過電話簿，居然仲死雞撐飯蓋，聲稱中央有關部門曾問過佢係咪有意參與新一屆全國政協工作，但鑑於自己被廉政公署調查緊，「慎重考慮」後至答覆現階段唔適合參與全國政協嘅「高層工作」。即係話，唔係中央唔畀佢做，而係佢自己唔做喎。

叮，呢啲咪就係跌落地揦番拃沙囉！貪曾被本報踢爆「貪遍省港澳、歎盡海陸空」，引起滔天民怨，成為過街老鼠，廉署介入調查，依家仲未知結果，如果佢做咗國家領導人先至畀廉署請去飲咖啡，甚至可能鋃鐺入獄，咁豈不是成為國際大笑話？雖然話政協早已淪為藏污納垢之所，但點都要顧番少少形象o架，尤其家陣中共新班子大力反貪，如果將貪曾呢粒老鼠屎擺上神枱，即係唔衰攞嚟衰啫，你估北大人真係傻嘅咩。再講吖，委任一個英國爵士做中國領導人，都好搞笑啫，係咪！

嗱，有人踢爆貪曾講大話。其實，對於係咪按照慣例委任貪曾擔任政協副主席，中央之前一直猶豫不決，有人大代表話到明如果貪曾入政協，佢將會辭職，中央鑑於港人對貪曾極度反感，最後先至順應民意將佢除名，而唔係佢自己唔做。你話喇，佢咁都要死撐，面皮係咪夠晒厚呢？

講開又講，貪曾唔只貪婪成性，而且貪慕虛榮，佢死都唔肯放棄英女王御賜嘅爵士銜，如果可以做國家領導人咯喎，佢早就撲到去喇，點會自己放棄吖。

不過咁，雖然貪曾死雞撐飯蓋，死都唔肯認衰，但總算講出一個事實，就係佢涉及貪腐醜聞呢單嘢手尾好長，吟詩都吟唔甩，如果唔係，廉署都唔使查咁耐喇。計太一叮話齋，善有善報，惡有惡報，時候一到，一切都報。貪曾做唔成國家領導人都仲係小事，隨時被清算貪腐醜行至係大件事，佢被稱為「香港陳水扁」，阿扁嘅今日，可能就係佢嘅明日呀，叮！